1
أُم وحَاضنة ضَناها بحُرقة
وِبتِبكي مِن نار الفُرقَة
جَسمه مِتَلِّج جِتِّتُه زَرقة
وبينزِف ومفيش إسعاف
قبل ما يكتر ويزيد ألمه
كان في الفَصل وماسِك قَلَمُه
فَجأة المَريَلَة شربِت دَمُّه
مات ولا حَد سِمع ولا شاف
مش فاهمين … إحنا هناخُد إيه م الدُّنيا غير شِبرين
يِعجِب مين … ليه فيه ناس مظلومة وناس تانيين ظالمين
قرار
دُنيا ومين هَيخَلِّد فيها
طَب ليه نِقتِل بَعض عَليها
حَتَّى كَفَنَّا مالوهشي جيوب
ياللي لا تِنعَس ولا بِتنام
ده العُمر إللي مافُوهشي سلام
عُمر وضايع مش مَحسُوب
يا مولانا إسمَع لِدُعانا فيه جُوَّانا سَواد وذنوب
يا سَيِّدنا ساعِدنا إسنِدنا وإنجِدنا وكفايه حروب
1/2(1 تي 6: 7)تلميح
لأَنَّنَا لَمْ نَدْخُلِ الْعَالَمَ بِشَيْءٍ، وَوَاضِحٌ أَنَّنَا لَا نَقْدِرُ أَنْ نَخْرُجَ مِنْهُ بِشَيْءٍ.
(مز 121: 4)اقتباس
إِنَّهُ لَا يَنْعَسُ وَلَا يَنَامُ حَافِظُ إِسْرَائِيلَ.
2
والأم دي ماتِت مِن جُوعها
جَف لَبَنها إديت له دموعها
لكن ماتت حاضنة رَضيعها
ماتت حاسَّه بنار ومرار
طِفل بيُصرُخ ويقول آه
وأبوه بيصَرَّخ ويَّاه
أصل منين هيجيب لُه دواه
وعلى الدَّوا والأكل حصار
حَد يحوش … حَد يحِن دي ناس بتإن وشَعب حَزين
إحنا وحوش …وللا بنِنسى إن إحنا أساساً بني آدمين
3
أصوات إنفِجارات ومَدافِع
ناس بِتهاجِم ناس بِتدافِع
أنا مش عارِف إيه الدَّافِع
إيه بيخَلِّي الدَّم يسيل
أو ليه تِبدَأ بالعِدوان
لو إنسان طَب ما أنا إنسان
أنا من حقي أعيش في أمان
من غير خوف ودموع وعويل
سيبني أعيش … ماتقَرَّبش لبَلَدي وبيتي ماتِرهِبنيش
سيبني أعيش … عايز أنام بالليل في أمان ما تهَدِّدنيش
4
مين هَيوَقَّف ضَرب النَّار
حَرب ودايره ليل ونهار
وبيوت تتهد وتِنهار
وجَناين تِصبَح خَرابات
صَواريخ وقنابل ورصاص
ناس مِن ناس تانيه بتِنداس
إيد مَرمِيَّه وجَمبَها راس
وجَسَد بَقَى أجزاء وفُتات
ذنبهم إيه … ناس أبريا بتموت أنا باأسأل غِلطوا ف إيه؟
كل ده ليه … … ناس بِتموت وِمَنِلقاش قَبر نشيلهم فيه
5
ليه بَقَى فيه أسلِحه نَوَوِيَّه
صِراعات وَحشِيَّه ودَمَوِيَّه
ومَفيش في الكوره الأرضيه
حِتَّه مَفيش جُوَّاها خصام
إرحَمنا يا رب إرحَمنا
هات من تاني يا رَب سَلامنا
داوي جراحنا وإشفي آلامنا
إحنا ف مِحنه كَما الايتام
فين يا ضمير فين يا ضمير العالَم صُوتَك ساكِت ليه
حِمل كبير … فوق ضَهرنا شايلينُه ودايماً ماشيين بيه
(مز 123: 3)اقتباس
ارْحَمْنَا يَا رَبُّ ارْحَمْنَا، لأَنَّنَا كَثِيرًا مَا امْتَلأْنَا هَوَانًا.
6
يا إلهنا عَشان إنتَ معانا
وإيديك ساندانا وشايلانا
عَلَشان واخِد بالَك مِننا
وسط العنف سلام يملانا
لينا ف قَلب العالَم ضيق
ومفيش حاجه تبِل الرِّيق
بس العالَم إنتَ غلبتُه
يَعني هَتُفرَج لَمَّا تضيق
وقت الخُوف … مش بنخاف جُوَّانا إيمان مِدِّينا أمان
مهما نشُوف … مهما نقابِل عَتمه هيجي النُّور ويبان
(يو 16: 33)اقتباس
قَدْ كَلَّمْتُكُمْ بِهَذَا لِيَكُونَ لَكُمْ فِيَّ سَلاَمٌ. فِي الْعَالَمِ سَيَكُونُ لَكُمْ ضِيقٌ، وَلكِنْ ثِقُوا: أَنَا قَدْ غَلَبْتُ الْعَالَمَ».
7
يا رب إحنا كتير دَمَّعنا
وحزِننا وكِترِت أوجاعنا
على الحُب يا رَحمَن جَمَّعنا
خَضَّر تاني الأرض البُور
نَشِّف دَمعِتنا على خُدودنا
دافِع عَنَّا وإحمي حُدودنا
خَلِّي سَلامَك إنتَ يسُودنا
مَشِّي الضَّلمه وإبعَت نُور
مِد إيديك … مالناش غيرَك وَقت الضِّيقَه بنِهرَب ليك
مِد إيديك … إحنا تِعِبنا وجينا وسيبنا حمولنا عليك
1/2(رؤ 21: 4)تلميح
وَسَيَمْسَحُ اللهُ كُلَّ دَمْعَةٍ مِنْ عُيُونِهِمْ، وَالْمَوْتُ لَا يَكُونُ فِي مَا بَعْدُ، وَلَا يَكُونُ حُزْنٌ وَلَا صُرَاخٌ وَلَا وَجَعٌ فِي مَا بَعْدُ، لأَنَّ الأُمُورَ الأُولَى قَدْ مَضَتْ».
(مز 46: 1)تلميح
اَللهُ لَنَا مَلْجَأٌ وَقُوَّةٌ. عَوْنًا فِي الضِّيْقَاتِ وُجِدَ شَدِيدًا.
