1
إرفع راسَك فُوق إنتَ قِبطى
إرفَع راسَك فُوق إنتَ مَصرى
ماهو قِبطى يعنى مَصرى ومَصرى يعنى قِبطى
2
لا أقليَّات ولا ذمِّيين
لأ دَه إحنا مواطنين أصليين
بيفَرَّقوا بينَّا مَعَ إنِّنا
كُلِّنا مَعَ بَعضِنا مَصرِيين
قرار
أنا دايمًا باأدعى فـ كُل صلاة
ومُنايا نخَلِّى الدين لله
وِنخَلِّى الأرض للجَميع
ده مَحَدِّش واخِد حاجَة معاه
3
أنا مَصرى باآقولها بعِلو الصُّوت
وماعادشى لا سلبيَّة ولا سكوت
مش باأدفَع جِزيَه باأخُش الجيش
مِن حُبِّى لمَصر عَشانها أموت
4
عادى لو فيه بينا إختلافات
لكن مايكونشى فيه خلافات
ياللا نبتدى صفحة جديده
والتمييز يبقى عهد وفات
5
إرفع راسَك فُوق إنتَ قِبطى
إرفَع راسَك فُوق إنتَ مَصرى
ما هو قِبطي يعنى مَصري ومَصري يعنى قِبطي
