رافعينلك يا إلهنا صلاة.. ملناش غيرك يا الله
وعشان انت الحق ضروري.. العدل هياخد مجراه
لو حقنا مهضوم أو ضاع.. صَلَح من تاني الأوضاع
بدموع عنينا جينا تعيننا.. ملناش غيرك نترجاه
اشفي لنا قلوبنا المكسورة.. عزّي أي نفوس مقهورة
صَبَرنا على اللي جرى لنا.. في "نجع حمادي" و"بهجورة"
أطفال لابسين لبس جديد.. راحوا يصلوا فـ ليلة العيد
من غير ذنب اتقتلوا يا عالم.. ده يرضي مين وبإيه ها يفيد؟؟
(مز 147: 3)تلميح
يَشْفِي الْمُنْكَسِرِي الْقُلُوبِ، وَيَجْبُرُ كَسْرَهُمْ.
و أدي أم وحاضنة الصندوق.. بتقول لابنها مالك فُوق
جهزت لك الأكل بإيدي.. قوم وارجع وويّايّا ودوق
لبسك ماله الدم ملاه؟ ده أنا لسه حالًا كوياه
مالك ساكت ومبترُدِش؟ صعبانة عليّ يا ولداه
دول ستة غير الإصابات.. قولوا كفاية للعصابات
أنا من حقي أعيش بكرامتي.. ويعيش في سلام الأقباط
سلمنا أمرنا في إيديك.. والظالم سايبينه عليك
احنا سامحنا اللي ظلمنا.. اتصرف زي ما يرضيك
مش هنقابل نار بالنار.. ولا عايزين ناخد بالتار
عايزينك تيجي تعزينا.. وتشيل مِنا أي مرار
1/2(مز 37: 5)تلميح
سَلِّمْ لِلرَّبِّ طَرِيقَكَ وَاتَّكِلْ عَلَيْهِ وَهُوَ يُجْرِي،
(رو 12: 17-19)إعادة صياغة
(17) لَا تُجَازُوا أَحَدًا عَنْ شَرٍّ بِشَرٍّ. مُعْتَنِينَ بِأُمُورٍ حَسَنَةٍ قُدَّامَ جَمِيعِ النَّاسِ. (18) إِنْ كَانَ مُمْكِنًا فَحَسَبَ طَاقَتِكُمْ سَالِمُوا جَمِيعَ النَّاسِ. (19) لَا تَنْتَقِمُوا لأَنْفُسِكُمْ أَيُّهَا الأَحِبَّاءُ، بَلْ أَعْطُوا مَكَانًا لِلْغَضَبِ، لأَنَّهُ مَكْتُوبٌ: «لِيَ النَّقْمَةُ أَنَا أُجَازِي يَقُولُ الرَّبُّ.
ما بتنعسشي ولا بتنام.. وكلام مش بس كلام
قُلت مبارك شعبي فــ "مصر".. ابعت تاني لـ"مصر" سلام
1/2(مز 121: 4)إعادة صياغة
إِنَّهُ لَا يَنْعَسُ وَلَا يَنَامُ حَافِظُ إِسْرَائِيلَ.
(إش 19: 25)اقتباس
بِهَا يُبَارِكُ رَبُّ الْجُنُودِ قَائِلًا: «مُبَارَكٌ شَعْبِي مِصْرُ، وَعَمَلُ يَدَيَّ أَشُّورُ، وَمِيرَاثِي إِسْرَائِيلُ».
