أرشيف كلمات الترانيم المسيحية | قاعدة بيانات الأناشيد الروحية على الإنترنت

فهرس الترانيم | ترنيمة مكتوبة | نص الترتيلة

كلمات ترنيمة صباح الخير، ربي يا صانع كل خير *

 

1- أنا أول ما اصحى من النوم                 لازم أفتح عيني عليك

علشان أبدأ بيك اليوم              وأسلم أمري ف إيديك (2)

عنك أبداً ما استغناش              وف كل أموري مشاركني

يبقى إزاي يومي هيتعاش                   من غير ما الأول تباركني (2)

 

القرار

صباح الخير              ربي يا صانع كل خير

صباح النور               إلهي يا ملك الدهور (2)

صباح مليان ببركة وحب                   بوجودك معايا يا رب (2)

صباح الخير

 

2- عينك صاحيه ومش بتنام                   سهران ترعاني وتحميني

ف اتطمن وأنام ف سلام             والصبح ألاقيك بتصحيني (2)

بركاتك مالهاش مثيل              بتحول حزني لأفراح

وان كان صعب عليا الليل                  بتعوضني بأحلى صباح (2)

 

3- بالليل روحي تبكر ليك            وبتسمع صوتي ف باكر

أبدأ بدءاً حسناً بيك                 ولوصاياك دايماً فاكر (2)

فرصة جديدة نثبت فيك            ويا بداية كل نهار

إدينا يوم فيه نرضيك              وحياة توبة باستمرار (2)

____________________
* كلمات: جوزيف كمال - ألحان: ماريو عماد - ترنيم: كورال كلمة الحياة (بكنيسة السيدة العذراء بالمطرية): أداء فردي: آدم بيشوي - داليدا سمير - بيتر إميل - بربتوا بيتر - حنة رؤوف - جاكلين سعد - ماريان سعد - مينا عماد - يوسف سعيد - فيبي أيمن - أبانوب عاطف - بيمن إميل - رينيه رسمي - ماريو عماد - ريمونا رسمي - ماري يوسف - مايكل صفوت.

---