تماجيد ومدائح الشهداء والقديسين المكتوبة

كلمات تمجيد القديس الأنبا بيشوي: في صفوف المنتصرين *

في صفوف المنتصرين                الأبرار القديسين

وقف الراهب الأمين          بينيوت افا بيشوي

من صغره صحيح مختار              يمشي طريق الأنوار

ويعيش بجهاد من نار                   بينيوت افا بيشوي

ساب العالم وما فيه            ومشي وداسه برجليه

ولا عمره اتأثر بيه            بينيوت افا بيشوي

في برية شيهيت               عالصخر بنى هناك بيت

قال ويا حبيبي بقيت          بينيوت افا بيشوي

راهب زاهد وبتول            بمخافة الله مشغول

اصل العالم هيزول            بينيوت افا بيشوي

ويسوع كان ليه بيزور                 يملى له حياته بنور

يزرع له في قلبه سرور                بينيوت افا بيشوي

القديس جاب بإيديه            ميه غسل بيها رجليه

ويا بخته اتبارك بيه           بينيوت افا بيشوي

أعمال بر وصلوات           ومحبه وانكار ذات

والبعد عن اللذات              بينيوت افا بيشوي

يربط شعره طول الليل                 في السقف بحبل طويل

بيشده ان كان بيميل           بينيوت افا بيشوي

علشان يسهر ما ينام           ويعيش بصلاه وأصوام

كان رافض الاستسلام                  بينيوت افا بيشوي

جاله يسوع سنه كبير                   قام شاله بدون تفكير

مشي بيه حباً للخير           بينيوت افا بيشوي

في السكة وكان ماشي بيه              عرف انه الرب فاديه

قال بفرح مجداً ليه            بينيوت افا بيشوي

فرح ان إلهه معاه              وانه سمح ليه بلقاه

طوبى للي يعيش وياه         بينيوت افا بيشوي

دي مكافأه لأنه خدوم          وحنين قلبه رحوم

مش بس صلاه او صوم                بينيوت افا بيشوي

طوبى للرجل الكامل          مع ربه بيتعامل

واللي بوصاياه عامل                   بينيوت افا بيشوي

طوبى للسالك بوقار           وبعيد عن الأنظار

كالشمس يضئ البار          بينيوت افا بيشوي

صليلنا طول الأيام            نبعد عن كل ملام

علشان نوصل بسلام                   بينيوت افا بيشوي

تفسير اسمك في افواه كل المؤمنين الكل يقولون يا إله الأنبا بيشوي اعنا أجمعين

____________________
* ترنيم: ساتر ميخائيل مع روماني يسري.

---