كلمات ترنيمة كل إناء مكسور *

(1) كُل إناء مَكسور مِتشَقَّق
رَبِّي جَمالَك فيه هايبان
فاضي ولَكِن فيك بِنصَدَّق
فيض مِش بَس يكون مَليان


شُكرًا ليك عَلى تَعَبَك فينا
تَشكيلَك فَخَّاري حَكيم
عَلى صَبرَك عَلى كُل فَشَلنا
وأناتَك يا ابو قَلب رَحيم


(ق) اظهِر عَمَل النِّعمَة
في أواني مَليانَة عُيوب
بَس إيديك اتمَدِّت
وبتِرسِم فيها المَحبوب


أرجوك كَمِّل شُغلَك فيها
وأواني كَرامَة خَلِّيها
تَشكيلَك هوَّ المَطلوب


(2) كُل مَقاصِد قَلبَك لينا
شُغلَك فينا دا شيء مَضمون
كُل الخير اللِّي انتَ قَصَدتُه
لِحَياتنا لازِم هايكون


رَغم فَساد شَوَّه أوانينا
رَغم مُحاولات الشِّرِّير
مين زَيَّك مِش هاتِفشَل فينا!
إنتَ عَظيم جايّ بتَغيير


(3) ياللِّي بَذَلت الابن عَشانَّا
وعَطيتنا مَعاه البَرَكات
قادِر تِشبِع فينا نُفوسنا
وتعَيِّشنا السَّماويَّات


لينا رَصيد النِّعمَة هايفضَل
مِن قَلبَك دايمًا بيفيض
وَقت ما نِتعَب وَقت ما نِفشَل
تِلحَقنا بسَندَة وتَعضيد