يعقوب 5 - تفسير رسالة يعقوب

+ في المرة السابقة:

+ إنتهينا في المرة السابقة بعدد 11 من الإصحاح الخامس:

 "هَا نَحْنُ نُطَوِّبُ الصَّابِرِينَ. قَدْ سَمِعْتُمْ بِصَبْرِ أَيُّوبَ وَرَأَيْتُمْ عَاقِبَةَ الرَّبِّ. لأَنَّ الرَّبَّ كَثِيرُ الرَّحْمَةِ وَرَؤُوفٌ" (رسالة يعقوب 5: 11)

+ في هذه المحاضرة: الإصحاح الخامس من رسالة معلمنا يعقوب من الآية 12-20 (الآخر).

 نصائح ووصايا تتفق مع وصايا الرب يسوع في الموعظة على الجبل

1- لا تحلفوا:

 "لكِنْ قَبْلَ كُلِّ شَيْءٍ يَا إِخْوَتِي، لاَ تَحْلِفُوا "

+ من ضمن الوصايا اللى بيقولها لنا معلمنا يعقوب، إن الواحد ميحلفش.

الرب يسوع أيضًا في الموعظة على الجبل أوصانا " لاَ تَحْلِفُوا الْبَتَّةَ ":

+ في العهد القديم كان ممكن الواحد يحلف. لكن كان عليه يلتزم بالحلف اللى قاله. وعندما جاء ربنا يسوع المسيح له المجد قال لنا: "«أَيْضًا سَمِعْتُمْ أَنَّهُ قِيلَ لِلْقُدَمَاءِ:لاَ تَحْنَثْ، بَلْ أَوْفِ لِلرَّبِّ أَقْسَامَكَ. وَأَمَّا أَنَا فَأَقُولُ لَكُمْ: لاَ تَحْلِفُوا الْبَتَّةَ، لاَ بِالسَّمَاءِ لأَنَّهَا كُرْسِيُّ اللهِ، وَلاَ بِالأَرْضِ لأَنَّهَا مَوْطِئُ قَدَمَيْهِ، وَلاَ بِأُورُشَلِيمَ لأَنَّهَا مَدِينَةُ الْمَلِكِ الْعَظِيمِ. وَلاَ تَحْلِفْ بِرَأْسِكَ، لأَنَّكَ لاَ تَقْدِرُ أَنْ تَجْعَلَ شَعْرَةً وَاحِدَةً بَيْضَاءَ أَوْ سَوْدَاءَ. بَلْ لِيَكُنْ كَلاَمُكُمْ: نَعَمْ نَعَمْ، لاَ لاَ. وَمَا زَادَ عَلَى ذلِكَ فَهُوَ مِنَ الشِّرِّيرِ." (إنجيل متى 5: 33-37).

+ فمعلمنا يعقوب مش بيقول حاجة جديدة، بيقول نفس اللى قاله ربنا يسوع.

"لاَ تَحْنَثْ " في العهد القديم أكملت لتصبح في العهد الجديد " لاَ تَحْلِفُوا الْبَتَّةَ ":

+ بس أنا بفكركم إن في العهد القديم كانت الوصية أكثر: "لاَ تَحْنَثْ " يعني حتى لو اقسمت لا تخلف.

+ لكن مع الأيام والأجيال ثبت ان الإنسان مش قد كلامه أبدًا. وإن الإنسان لا يملك ما يحلف به. لا يملك سماء، ولا يملك الارض، ولا يملك شعره واحدة من شعر رأسه، ولا يملك أورشليم، ولا يملك حاجة.

المسيحي الحقيقي لا يحلف أبدًا:

+ إاذا كان مفيش في ايديه حاجة ومفيش في سلطته حاجة، طب بيحلف بأي أساس عشان كده الإنسان المسيحي الحقيقي لا يحلف البتة.

لماذا نهانا معلمنا يعقوب عن "الحلفان" "قَبْلَ كُلِّ شَيْءٍ ":

+ ونستغرب إن معلمنا يعقوب حاطتها باهتمام شديد عندما يقول: "لكِنْ قَبْلَ كُلِّ شَيْءٍ يَا إِخْوَتِي، لاَ تَحْلِفُوا". طب ممكن يكون في حاجات كتير قبل الحلفان يا معلمنا يعقوب!

+ الحلفان خطية مركبة لأن فيها الواحد عنده ثقة زيادة بنفسه.

+ الحلفان يحمل نوع من الكبرياء: إن الواحد يحلف فيها نوع من الكبرياء، كأنه يعني ضامن كل حاجة، وكأنه عارف كل حاجة.

+ المتواضعون ليس لديهم الثقة الكاملة إلا في الله وحده: بينما الإنسان المتواضع متأكد دايمًا إنه مش ضامن حاجة، ولا يعرف كل حاجة. فدائمًا يقول اعتقد، لكن ميقولش أبدا حلفان.

+ سبق أن تكلم في رسالته عن ضرورة اتضاع الأغنياء: لذلك إذا كان بيتكلم قبلها عن الاتضاع عامة، وخاصة اتضاع الأغنياء. فهنا بيقول: "قَبْلَ كُلِّ شَيْءٍ.. لاَ تَحْلِفُوا (الْبَتَّةَ)".

+ الله يسمح بظهور بطلان الحلفان حتى يدرك الإنسان ضعفه: الواحد دائمًا يفتكر ان اللى بيحلف ده، لازم ربنا يسمح إن كلامه يطلع غلط في مرة او مرات، عشان يبطل حلفان، عشان يبان إنه لايعرف، وإنه لا يملك لكي يحلف.

"لاَ تَحْلِفُوا، لاَ بِالسَّمَاءِ، وَلاَ بِالأَرْضِ، وَلاَ بِقَسَمٍ آخَرَ. بَلْ لِتَكُنْ نَعَمْكُمْ نَعَمْ، وَلاَكُمْ لاَ، لِئَلاَّ تَقَعُوا تَحْتَ دَيْنُونَةٍ".

2- لا تكثر من الكلام وليكن كلامك صادقًا " لِتَكُنْ نَعَمْكُمْ نَعَمْ، وَلاَكُمْ لاَ "

+ المسيح له المجد قال: "لِيَكُنْ كَلاَمُكُمْ: نَعَمْ نَعَمْ، لاَ لاَ" لما تقول نعم، ابقى نعم مفيهاش فصال، ولو قلت لأ تبقى لأ، مش هتبقى نعم ابدًا.

+ طبعًا لئلا واحد يقول نعم وميحلفش وتكون النعم بتاعته لا، فيقوله " لِتَكُنْ نَعَمْكُمْ نَعَمْ " فيوم ما تقول نعم تبقى نعم. يعني لما تقول لواحد صح الكلام ده، يبقى صح مينفغش تحتمل اى كلمة تانى. ولو قلت لأ، تبقى لأ.

+ خليك كإنسان بتخاف ربنا كلمتك دايمًا كلمة واحدة، ومفيهاش فصال، ومتسمحش لحد يخليك تحلف او يخليك تكذب.

3- كثرة الكلام توقعك تحت الدينونة

" لِتَكُنْ نَعَمْكُمْ نَعَمْ، وَلاَكُمْ لاَ، لِئَلاَّ تَقَعُوا تَحْتَ دَيْنُونَةٍ"

الرب يسوع أيضًا علمنا هذا في الموعظة على الجبل:

+ لو زودت في الكلام ربنا يسوع قال كلمة مهمة قوى قال: "وَمَا زَادَ عَلَى ذلِكَ فَهُوَ مِنَ الشِّرِّيرِ" (إنجيل متى 5: 37) الشرير هو الشيطان. يعني لو قلت اكتر من كلمة "نعم" احتمال يكون الشيطان هو اللى غذى الحتة دى، ولو قلت اكتر من كلمة "لأ" احتمال يكون الشيطان هو اللى اشتغل في الموضوع ده.

+ يعني "كل كلمة بطالة تعطون عنها حسابًا" " كُلَّ كَلِمَةٍ بَطَّالَةٍ يَتَكَلَّمُ بِهَا النَّاسُ سَوْفَ يُعْطُونَ عَنْهَا حِسَابًا يَوْمَ الدِّينِ" (إنجيل متى 12: 36).

+ لو الواحد بيقول "النعم" مرة واحدة وتطلع نعم، خلاص الناس هتتعود عليه، دى طريقته "النعم" بتاعته "نعم" و"اللأ" بتاعته "لأ".

+ اللى بيزود في الكلام كتير لازم الشيطان يلعب بلسانه.

+ كتر الكلام يوقعنا في دينونة وكلنا جربنا نقول: "ياريتنا ما اتكلمنا، ويارتنا ما زودنا في الكلام، ياريتنا ما استفضنا في الشرح".

+ وفي ناس الحقيقة غاوية توقع الواحد، يعني لما تقول كلمة تأعد تدور وراها كده، طب ما أنا قلت "لأ" خلاص! "لأ" هي "اللأ". ولازم الشخص يقبلها بالروح دي.

"لاَ تَحْلِفُوا، لاَ بِالسَّمَاءِ، وَلاَ بِالأَرْضِ، وَلاَ بِقَسَمٍ آخَرَ. بَلْ لِتَكُنْ نَعَمْكُمْ نَعَمْ، وَلاَكُمْ لاَ، لِئَلاَّ تَقَعُوا تَحْتَ دَيْنُونَةٍ "

+ هذا يؤكد ان كلام معلمنا يعقوب ماشى مع الموعظة على الجبل زى ما ربنا يسوع له المجد قالها.

إنشغلوا دائمًا بالصلاة في وقت المشقة والترتيل في وقت الفرح

"َأَعَلَى أَحَدٍ بَيْنَكُمْ مَشَقَّاتٌ؟ فَلْيُصَلِّ"

+ آية جميلة وصغيرة وياريت كلنا نحفظها.

الصلاة هي الحل الوحيد في وقت المشقة:

+ اللى عنده مشقات الحل الوحيد الأساسي إنه يصلي.

+ وطبعًا أنواع المشقات كتيرة. لما عرض علينا التجارب في أول إصحاح لقينا ملخص الكلام "صل"، أيًا كان نوع المشقة (اقتصادية – اجتماعية – روحية – تربوية – زوجية) كلها مشقات.

+ فاللي عليه مشقة يصلي. ده حل بسيط وحل في ايدين الكل، وحل مش محتاج فلوس، ومش محتاج ناس، ولا مكان.

"َأَعَلَى أَحَدٍ بَيْنَكُمْ مَشَقَّاتٌ؟ فَلْيُصَلِّ"

+ ومين معلهوش مشقات؟! يبقى لازم كلنا نصلي.

+ ده ساعات الواحد لما ربنا يلاقيه مش بيصلي بزمة، يسمح له بمشقات عشان يصلي.

 + وساعات الواحد لما يلجأ إلى حلول كتيرة تتعقد الدنيا، وكل الامور تبوظ عشان يصلي.

الصلاة هي أهم عمل تقوم به على الأرض:

+ لأن مجرد الصلاة لوحدها هدف عند ربنا إن الواحد فينا ينشغل بالصلاة.

+ فوقفة الصلاة حسب كلام القديسين هي اهم عمل يعمله الإنسان طول حياته، أهم حاجه في حياة الواحد.

+ يعني لو صفوا عمرنا كده كله، هيلاقوا شوية الصلاة اللي فيه هم اللي هيوزنوا عند ربنا.

+ لكن ياما روحت وياما جيت وياما اشتغلت، وياما كسبت وياما خسرت،... كل ده كلام هواء! مش هيتحسب. "َأَعَلَى أَحَدٍ بَيْنَكُمْ مَشَقَّاتٌ؟ فَلْيُصَلِّ"

أيضًا في أوقات الفرح صل ورتل: "أَمَسْرُورٌ أَحَدٌ؟ فَلْيُرَتِّلْ"

+ مسرور يعني معندوش مشقات بردو يرتل، يعني يصلي بطريقة مفرحة، ده مبدأ حلو ان الواحد لما يكون مبسوط يرتل يسبح ربنا.

+ لكن واحد يبقى مبسوط يفكر يضيع وقته بطريقه غير روحية! طب ليه؟! اذا كنت مبسوط ده خير ربنا عليك، رتل، رتل يعني صلي بفرح، أو سبح بفرح.

سر مسحة المرضى (صلاة القنديل) تسلمته الكنيسة من آبائنا الرسل

 + كلمة "شيوخ" هنا في الأصل اليوناني (إبريسفيتيروس) precbuterwc أي "قسوس الكنيسة" وليس "شيوخ بمعنى كبار السن"، الترجمة الدقيقة القبطي السليمة "قسوس الكنيسة".

" فَلْيَدْعُ قسوس الْكَنِيسَةِ فَيُصَلُّواعَلَيْهِ وَيَدْهَنُوهُ بِزَيْتٍ بِاسْمِ الرَّبِّ"

 + اللى هي "صلاة القنديل" أو "سر مسحة المرضى" ده الأساس بتاعها.

كنيستنا القبطية الأرثوذكسية حريصة على ما تسلمته من آبائنا الرسل:

+ إحنا مألفناش حاجه في الكنيسة القبطية، ده تعليم الكتاب اللي عشنا به 2000 سنة.

+ فلما نلاقى واحد مريض، نجيب قسوس الكنيسة يصلوا عليه.

سؤال: لماذا الكاهن هو الذي يصلي للمريض؟ ألا يقبل الله صلاة أي إنسان؟!

 ("طب ما كل الناس تصلي! إشمعنى القس؟!")

+ القس واخد موهبة خاصة، واخد درجة خاصة من ربنا، فهيبقى له نعمة خاصة عند ربنا.

آيات كتابية تؤكد صحة "سر مسحة المرضى" الذي تمارسه الكنيسة القبطية حتى الآن:

" وَيَدْهَنُوهُ بِزَيْتٍ بِاسْمِ الرَّبِّ "

+ هذه الآية تؤكد إن اللى احنا عايشين عليه حتى الآن هو اللى كانوا عايشين عليه الآباء في المائة سنة الأولى (القرن الأول). " وَيَدْهَنُوهُ بِزَيْتٍ بِاسْمِ الرَّبِّ "

+ في آية تاني - علشان للي بيحب يستدل بآيات على صدق الأسرار عندنا:

 إنجيل مرقس إصحاح 6، السيد المسيح عندما أرسل تلاميذه لكي يصنعوا معجزات، وينشرون الكلمة، يقول:

 "وَدَهَنُوا بِزَيْتٍ مَرْضَى كَثِيرِينَ فَشَفَوْهُمْ" (إنجيل مرقس 6: 13).

+ إذًا حكاية إن القس أو الرسول يمسك زيت في ايده ويكون متصلي عليه ويدهن، عشان الشفاء ده، تقليد آبائى كتابى عايشين عليه بقى لنا 2000 سنة.

+ في ناس ما بيعجبهاش الكلام ده، وتيجي تقول إيه القنديل اللي إنتم بتخترعوه ده؟! إحنا ما اخترعناش حاجه، إحنا اللي استلمناه من المسيح مسلمينه من الآباء الرسل جيل بعد جيل لغاية النهاردة.

لماذا "صلاة القنديل" أو "القنديل العام" مرتبط بالصوم الكبير؟

+ تلاحظوا إن الموسم ده (الصوم الكبير) كل الناس تعمل قناديل، ونيجي في آخر الصوم الكبير نعمل صلاة القنديل العام في الكنيسة.

+ طب إية العلاقة؟ هو لازم كل بيت يكون فيه مريض؟!

+ الكنيسة دائمًا كأم تعلم أولادها إن في نوعين من الأمراض: في مرض ظاهرى مرض جسدي، وفي مرض خفى أخطر وأهم هو المرض الروحي.

+ وإن كان مفيش مرض ظاهرى واضح بالتأكيد في مرض روحي موجود.

+ فإذا كان الواحد حاسس بخطورة المرض الروحي، هيطلب له شفاء، وهيحتاج إلى نعمة الشفاء.

+ ومن هنا لأن ده موسم التوبة، الكنيسة تسميه كمان "موسم الشفاء".

+ ففي الصوم الكبير كل الشعب يخف! كل الشعب بالصلاة والصوم يعمل أو يصلي قنديل لكي يبرأ من أمراضه.

قراءات الصوم الكبير تركز على معجزات الشفاء الروحي (بالتوبة وصلاة الإيمان)

+ وتلاحظوا إن حتى قراءات الصوم الكبير، فيها تركيز على الأمراض: المولود أعمى، مريض 38 سنة، وقصص شفاء كثيرة وكلها تأخد المعنى الروحي.

 اللي بآله خطية 38 سنة، واللي اتعمى عن رؤية المسيح من كتر خطاياه، كل ده محتاج شفاء.

+ والشفاء المقصود به هنا التوبة وصلاة الإيمان.

+ وهيبان في الكلام علاقة الشفاء الروحي بالجسد.

"أَمَرِيضٌ أَحَدٌ بَيْنَكُمْ؟ فَلْيَدْعُ قسوس الْكَنِيسَةِ فَيُصَلُّواعَلَيْهِ وَيَدْهَنُوهُ بِزَيْتٍ بِاسْمِ الرَّبِّ".

الصلاة لابد أن تكون بإيمان حتى تنال الشفاء الروحي والجسدي

علاقة الشفاء الروحي بشفاء الجسد:

+ طب إيه العلاقة؟! الواحد يمكن يهمه شفاء الجسد فقط.

+ لأ "وَإِنْ كَانَ قَدْ فَعَلَ خَطِيَّةً تُغْفَرُ لَهْ"، هذا يؤكد أن الطلب كان طلب روحي، زى ما هو طلب جسدي، طلب مغفرة الخطايا وأيضا طلب الشفاء الجسدي.

+ معجزة شفاء المفلوج (مت 9: 2-8)، (مر 2: 3-12)، (لو 5: 18-26)

 تبين أن الشفاء الروحي أصعب وأهم من الشفاء الجسدي

+ في معجزة شفاء المفلوج المسيح له المجد فرضوا عليه المفلوج، نزلوه كده دلوه من السقف قدام المسيح له المجد.

+ يقول الكتاب: "فَلَمَّا رَأَى يَسُوعُ إِيمَانَهُمْ" - الإيمان هنا مهم خالص - لم يقل له قم وامشى ولكنه قال له: "يَا بُنَيَّ، مَغْفُورَةٌ لَكَ خَطَايَاكَ". أعطى له الحاجة الأهم أولًا. الحاجة الغالية الأول.

+ بينما الناس تزمروا وهمهموا من يقدر أن يغفر خطايا؟ إيه اللي بيقوله الراجل ده؟ هو مين بيديه الغفران غير ربنا؟! وبعدين واحد تاني يقول: "ماهو كلام. هو حد شاف حاجه؟! أهو مغفورة لك خطاياك دي ماحدش عارف اتصرفت ولا لأ".

+ فالسيد المسيح قالهم: "انتوا فاكرين ان الكلام سهل" " أَيُّمَا أَيْسَرُ، أَنْ يُقَالَ: مَغْفُورَةٌ لَكَ خَطَايَاكَ، أَمْ أَنْ يُقَالَ: قُمْ وَامْشِ؟". انتم شايفين إنه أسهل لما أقول مغفور لك خطاياك؟! لأ دا انتم مش فاهمين حاجة! مغفورة لك خطاياك دى الأصعب، ودى الأهم، "وَلكِنْ لِكَيْ تَعْلَمُوا أَنَّ لابْنِ الإِنْسَانِ سُلْطَانًا عَلَى الأَرْضِ أَنْ يَغْفِرَ الْخَطَايَا" "يَا بُنَيَّ، مَغْفُورَةٌ لَكَ خَطَايَاكَ".

+ فبدأ بالغفران وانتهى بالشفاء. وأوضح في كلامه أن الغفران أصعب من الشفاء وأهم من الشفاء.

الشفاء الجسدي بدون التوبة وغفران الخطايا يؤدي إلى الهلاك:

+ لأن ممكن الواحد يبأه عيان في جسده ويخف. وبعدين؟! إن كانت خطاياه متشالتش يبقى في الآخر هيروح جهنم.

+ إن كان ماعرفش سكة التوبة، يبقى إيه يعني خف من مرضه. لكن الأهم جدًا يخف من المرض الروحي، حتى لو مرضه الجسدي أعد. بدليل إن المسيح قاله " مَغْفُورَةٌ لَكَ خَطَايَاكَ" واستمر مريض شوية.

+ لكن عشان يثبت المسيح له المجد إن اللى بيقوله ده مش كلام كده، قاله كمان " قُمْ وَاحْمِلْ سَرِيرَكَ وَاذْهَبْ إِلَى بَيْتِكَ".

+ في صلاة القنديل: يصلي الكاهن أولًا من أجل غفران الخطايا:

 إحنا نعمل زى ربنا يسوع المسيح، نطلب أولًا الغفران. في كل بيت ندخله نصلي قنديل يبقى الطلب الأساسى هو التوبة والغفران.

+ في التقليد القديم صلاة القنديل كانت احتفال توبة يسبقه الإعتراف بالخطيئة:

 وعشان كده التقليد القديم اللي يا ريت نرجعه، إن صلاة القنديل هي احتفال توبة للبيت كله. يعني كل واحد يأخذ أبونا الأول يعترف - مفروض كده - وبعدين كلهم يقدموا صلوات وصلاة القنديل، وفي الآخر يترشموا بالزيت. وكل اللي يهمهم مغفرة الخطايا. فرحانين بغفران الخطايا.

+ وان كان واحد عيان نطلب له كمان الشفاء.

+ ما يهم الكنيسة كأم أن يصل أبنائها إلى الملكوت بنوال نعمة غفران الخطايا:

+ لازم تعرفوا إن حتى في صلاة القنديل نحن لا نفرض على الله طلب الشفاء. فاحنا نلح جدًا في طلب الغفران، وعند الشفاء الجسدي نصلي سرًا قائلين: - نقولها سرا عشان الناس متزعلش - "يا رب لو مش عاوز تخففه سهل طريقه للملكوت لكن لا يضيع الملكوت منه". لأن الكنيسة كأم يهمها أن أولادها يوصلوا السماء. ودي حاجه بتاعة ربنا، يخف أو ما يخفش، دي نعمته.

+ لكن الحاجه اللي مش عاوزينه أبدًا يقولنا لأ: "يا رب سامحه، يا رب شيل خطاياه اللي فاتت كلها" ده ما يعنينا بالأكثر. ليه؟ لأن المصير الأبدي أهم من الكام يوم اللى هيقعدهم على الأرض. وخطاياه وأمراضه الروحية أخطر جدًا من أمراضه الجسدية. ثم إنه عيان النهارده، وهيخف بكره وهيرجع يعيا بعدها بفترة، ماهي حياة الدنيا كده مش دى المشكلة الكبيرة.

+ فتلاحظوا إن كلامنا ده، يتفق جدًا مع تعليم الكتاب.

أي عمل طقسى في الكنيسة لا بد أن يكون باسم الرب (الثالوث الاقدس)

"أَمَرِيضٌ أَحَدٌ بَيْنَكُمْ؟ فَلْيَدْعُ قسوس الْكَنِيسَةِ فَيُصَلُّواعَلَيْهِ وَيَدْهَنُوهُ بِزَيْتٍ بِاسْمِ الرَّبِّ".

الدهان بالزيت يكون بإسم الرب: "وَيَدْهَنُوهُ بِزَيْتٍ بِاسْمِ الرَّبِّ "

+ إحنا لما ندهن زيت دائمًا نقول الآتي: "باسم الآب أو مبارك الآب ضابط الكل، مبارك ابنه الوحيد يسوع المسيح، مبارك الروح القدس المعزى" يعني دائمًا باسم الرب. أي دهن ندهنه لازم يكون باسم الرب، أي عمل طقسى في الكنيسة لازم يكون باسم الثالوث الاقدس.

+ ساعات بنقول باختصار "باسم الآب والابن والروح القدس" وساعات نعطي البركة لكل الثالوث: مبارك الآب ضابط الكل، مبارك ابنه الوحيد يسوع المسيح ربنا، مبارك الروح القدس المعزي.

+ ساعات الكاهن يقولها قبطي لكن في كل الحالات، ندهن باسم الرب.

أشكال الزيوت المقدسة واستخداماتها:

+ بردو واحد يقول طب ده الزيت له اشكال واستخدامات كتير.

+ أيوه طبيعي لأن ده هنا "زيت مسحه المرضى"

+ لكن في عندنا "زيت الميرون (زيت الروح القدس)" اللى بيدشن الإنسان وبيختنه وبيعمله مسيحي بعد المعمودية.

+ وفي أنواع من الزيوت الأخرى:

 في زيت العظة في المعمودية

 وفى زيت الفرح في صلوات المعمودية

 وفى زيت البركة للعروسين اللي بنستخدمه في الإكليل.

+ كل دى زيوت مقدسة.

+ هي الفكرة ببساطة إن المادة (الزيت) لما نصلي عليه، نستودع المادة قوة روحية، وحسب صلواتنا:

 إذا كانت الصلوات دى بتقول لربنا خلى في الزيت قوة الشفاء يبقى فيه قوة الشفاء، ربنا يقول حاضر.

 اذا كانت الصلوات بتقول يا رب خلى فيه قوة البركة وسلام للبيت، خلاص يبقى الزيت فيه بركة وسلام للبيت.

+ إحنا كنيسة عندها إيمان بسيط تتعلم من المسيح وتنفذ على طول وتصلي والصلاة تعمل كل حاجة. " فَيُصَلُّواعَلَيْهِ وَيَدْهَنُوهُ بِزَيْتٍ بِاسْمِ الرَّبِّ".

الإيمان ضروري جدًا لنوال الشفاء

"وَصَلاَةُ الإِيمَانِ تَشْفِي الْمَرِيضَ، وَالرَّبُّ يُقِيمُهُ"

إيمان الكاهن أم المريض أم أقاربه؟

+ بردو واحد يقول، الإيمان؟ إيمان مين؟

 إيمان كل اللى بيصلوا، إيمان الكاهن، إيمان المريض، إيمان اللى حواليه. الإيمان قوة في الصلاة دائمًا.

بالإيمان نال المفلوج الشفاء:

+ لذلك الكتاب المقدس عندما ذكر لنا "معجزة المفلوج" قصد يقول: "فَلَمَّا رَأَى يَسُوعُ إِيمَانَهُمْ قَالَ لِلْمَفْلُوجِ: ثِقْ يَا بُنَيَّ. مَغْفُورَةٌ لَكَ خَطَايَاكَ" (إنجيل متى 9: 2).

+ وبان إيمانهم إن إيمانهم كان إيمان عملي، مش مجرد جايبين الراجل تعبان وخلاص، كان عندهم إصرار إن يوصلوا المفلوج أمام المسيح متأكدين انه طالما وصل للمسيح هيخف.

+ وهذا الاصرار خلاهم يتشعبطوا على السقف ويفكوا السقف الخشب، وينزلوا السرير امام المسيح، وعملوا شغلانة كبيرة بإصرار.

+ كان ممكن المسيح له المجد لو شخص عادي يتضايق إن هم فرضوا عليه واحد من السقف كده وهو بيوعظ، لكن عجب المسيح تصرفهم لأنه وجد فيه إيمان. "فَلَمَّا رَأَى يَسُوعُ إِيمَانَهُمْ، قَالَ لِلْمَفْلُوجِ: "يَا بُنَيَّ، مَغْفُورَةٌ لَكَ خَطَايَاكَ".

بالإيمان نالت المرأة نازفة الدم الشفاء:

(مت 9: 20-22)، (مر 5: 25-34)، (لو 8: 48)

+ نازفة الدم جاءت في وسط كل الناس الزحمة، وعندها إيمان بسيط في قلبها، اعتقاد قوي "إِنْ مَسَسْتُ ثَوْبَهُ فَقَطْ شُفِيتُ " بس هلمس طرف جلبيته هخف.

+ لا حد قالها إعملي كده ولا حد قبلها عمل كده. اهو ناس كتير بتلمس المسيح وما كنش حد عارف إن فيه معجزات. لكن دي إيمانها البسيط وثقتها، تعلقت وأخذت اللي عاوزاه.

بالإيمان نالت المرأة الكنعانية الشفاء لإبنتها: (إنجيل متى 15: 22-28)

+ المرأة الكنعانية ست مش يهودية خالص، سمعت عن المسيح ومعجزاته، فآمنت، وتعلق قلبها بشفاء ابنتها التي لها سنين في صرع، في حالة مش كويسة، بئيت تزن على المسيح منين ما يمشي قائلة: "ارْحَمْنِي، يَا سَيِّدُ، يَا ابْنَ دَاوُدَ! اِبْنَتِي مَجْنُونَةٌ جِدًّا". وآعده تزن طول السكة ومش راضية تبطل.

+ وكان لديها إيمان وإصرار أنه إذا تكلم معها كلمة هتخف.

+ والمسيح حاول يزجرها، وحاول ينفرها بكلام صعب في الأول: "لَيْسَ حَسَنًا أَنْ يُؤْخَذَ خُبْزُ الْبَنِينَ وَيُطْرَحَ لِلْكِلاَب "، ولكنها ردت قائلة: "نَعَمْ، يَا سَيِّدُ! وَالْكِلاَبُ أَيْضًا تَأْكُلُ مِنَ الْفُتَاتِ الَّذِي يَسْقُطُ مِنْ مَائِدَةِ أَرْبَابِهَا!". قال لها: "يَا امْرَأَةُ، عَظِيمٌ إِيمَانُكِ! لِيَكُنْ لَكِ كَمَا تُرِيدِينَ".

+ إيمانها بان فيه إيه؟ إصرار. إصرار. هتأخذ من المسيح اللي هي عايزاه، متأكده إنه يقدر! متأكده إنه هيعمل.

بالإيمان نال قائد المئة الشفاء لغلامه: (مت 8: 5-13)، (لو7: 6-10)

+ قائد المئة يبعت للمسيح له المجد يقوله: "ابني بيموت".

+ المسيح يقول أروح أشوفه،

+ يبعتله تاني يقوله: "لأ ماتجيش. تيجي ليه؟ّ ! تكلف نفسك ليه؟! أنا رجل يعرف معنى السلطان" "لِي جُنْدٌ تَحْتَ يَدِي. أَقُولُ لِهذَا: اذْهَبْ! فَيَذْهَبُ، وَلآخَرَ: ائتِ! فَيَأْتِي، وَلِعَبْدِيَ: افْعَلْ هذَا! فَيَفْعَلُ". أنت رجل لك سلطان "يَا سَيِّدُ، لَسْتُ مُسْتَحِقًّا أَنْ تَدْخُلَ تَحْتَ سَقْفِي، لكِنْ قُلْ كَلِمَةً فَقَطْ فَيَبْرَأَ غُلاَمِي". "قول كلمة بس، أنا مش طالب أكتر من كلمة". فالمسيح يقف مكانه ويقول: "لَمْ أَجِدْ وَلاَ فِي إِسْرَائِيلَ إِيمَانًا بِمِقْدَارِ هذَا!".

+ من مكاني هقول كلمة: "هو عرف كده؟! خلاص، اللي هو عاوزه لازم يخده. "اذْهَبْ، وَكَمَا آمَنْتَ لِيَكُنْ لَكَ".

+ ربنا بيفرح لما بيلاقي عندنا إيمان، ثقة فيه.

"وَصَلاَةُ الإِيمَانِ تَشْفِي الْمَرِيضَ، وَالرَّبُّ يُقِيمُهُ، وَإِنْ كَانَ قَدْ فَعَلَ خَطِيَّةً تُغْفَرُ لَهْ"

الرب هو الذي يقيم كل مريض وحاشا أن يكون بأحد غيره الشفاء:

+ أيضًا عبارة " وَالرَّبُّ يُقِيمُهُ "، دي مهمه ليه؟ لئلا واحد يقول إن القسيس اللى صلى هو اللى اقامه. قسيس مين؟! إحنا مش لسه بنقول: "وَيَدْهَنُوهُ بِزَيْتٍ بِاسْمِ الرَّبِّ "، ويصلوا بإيمان، " وَالرَّبُّ يُقِيمُهُ". كل إقامة، كل شفاء ينسب لله وحده. حاشا أن ينسب لآخر.

بصلاة الإيمان ننال غفرانًا لخطايانا:

"وَإِنْ كَانَ قَدْ فَعَلَ خَطِيَّةً تُغْفَرُ لَهْ".

+ يعني بالمره، بما إننا بنصلي للغفران، ومن أجل الشفاء فتبقى بركة الغفران وبركة الشفاء.

St-Takla.org Image: Arabic Bible verse: "The effective, fervent prayer of a righteous man avails much." (James 5: 16) - Arabic calligraphy, by Adib. صورة في موقع الأنبا تكلا: نص آية "طلبة البار تقتدر كثيرا في فعله." (يعقوب 5: 16) - فن بالخط العربي، الخطاط: أديب.

بالإعتراف والصلاة لأجل بعضنا البعض ننال الشفاء

(نصيحة آبائية تؤكد إيمان كنيستنا القبطية الأرثوذكسية بسر الإعتراف وبالشفاعة) 

في الكنيسة الأولى كان أهل البيت يعترفون قبل "صلاة القنديل":

+ " اِعْتَرِفُوا بَعْضُكُمْ لِبَعْضٍ بِالزَّلاَتِ" ده يؤكد إنه الإعتراف كان موجود في الآعده دي. بتاعة استدعاء قسوس الكنيسة.

هل المقصود بالآية "اِعْتَرِفُوا بَعْضُكُمْ لِبَعْضٍ بِالزَّلاَتِ"

الإعتراف لمن أخطأنا إليهم بالخطأ، وليس للكاهن؟!

+ ممكن واحد يقول يمكن المقصود بالآية " اِعْتَرِفُوا بَعْضُكُمْ لِبَعْضٍ بِالزَّلاَتِ ": الإعتراف لمن أخطأنا إليهم بالخطأ.

+ الكلام ده مظبوط في حالة إن كل الخطايا هي مجرد خطايا في بعض، لكن افرض فكرة شريرة جت في بال الواحد، هيقولها للناس ليه؟! افرض خد حاجة من حق ربنا، هيقولها للناس ليه؟!

+ ليست كل الخطايا موجهة للناس: في خطايا كتير مش موجهه للناس، في خطايا تبقى في العلاقة بين الانسان وبين ربنا طب دى هيعترفها للناس ليه؟! إلا لو كان في سر اعتراف. إلا لو كان "الِبَعْضٍ" ده المقصود به قسوس الكنيسة اللى هيقعدوا، والناس هتيجى تعترف بالزلات قصادهم عشان ترفع الخطايا.

لماذا لم يحدد معلمنا يعقوب أن الإعتراف يكون للقساوسة؟

+ واحد يقول: طب ليه ما قالش "اعترفوا للقساوسة" فقط؟

+ لأن سر الإعتراف في الكنيسة الأولى، كان علني.

+ إحنا دلوقتي الكنيسة بترحمنا وتستر علينا وتأخذ الواحد في جنب ونسمع اعترافاته. لكن القصة ما كنتش كده.

+ كان يقف الواحد قدام الناس كلها ويقول: "يا جماعة، أنا أخطيت، أنا كذبت". طب مين يقدر يقف قدام الناس كلها يقول الكلام ده؟!

+ كانوا زمان يعملوا كده. ليه؟ لأن دائمًا في قلبهم: "إن كنت غلطت قدام ربنا! يفرق إيه إن كان الناس تعرف؟!

+ المرأة الخاطئة بكت معترفه بخطاياها أمام الجميع (إنجيل لوقا 7: 36-50)

+ المرأة الخاطئه دخلت أمام كل الجمع المزدحم في بيت سمعان الفريسي، وجاءت عند قدمي يسوع وظلت تبكي. وقالت بدموعها كل اعترافاتها وخطاياها، فمعنى بكائها أن ما يقال عنها صحيح.

+ ولا اتكسفت من ناس ولا دورت على المسيح في حتة هادئة. هي قاعدة تعترف بصمت، بمشاعر بس.

+ وطبعًا كل الناس همهمت وكل الناس اتكلمت، وسمعان قال: "لَوْ كَانَ هذَا نَبِيًّا، لَعَلِمَ مَنْ هذِهِ الامَرْأَةُ الَّتِي تَلْمِسُهُ وَمَا هِيَ! إِنَّهَا خَاطِئَةٌ" - خاطئة أي زانية - وهي مش هاممها الكلام، هي كل اللى هاممها ان المسيح يقبل توبتها، ويقبل صلاتها، ويقبل دموعها، فالمسيح قبل.

الإعتراف نظام وضعه السيد المسيح، وأعطى سلطة "الحل والربط" للكهنة:

+ الاعتراف ببساطة سر من البداية، نظام وضعه ربنا يسوع المسيح، وعلى أساسه اعطى السلطان للرسل ومن بعدهم الكهنة: "كُلُّ مَا تَرْبِطُونَهُ عَلَى الأَرْضِ يَكُونُ مَرْبُوطًا فِي السَّمَاءِ، وَكُلُّ مَا تَحُلُّونَهُ عَلَى الأَرْضِ يَكُونُ مَحْلُولًا فِي السَّمَاءِ" (إنجيل متى 18: 18)

+ الخطية تقيد الإنسان وتربطه: اللى تحلوه ليه؟ لأن الكاهن وهو بيصلي في سر الإعتراف يقول: إقطع يا رب كل رباطات خطايانا.

 يعني الواحد بيبأه زي مربوط كده بخطية. مين يفك الرباط ده إلا سلطان المسيح له المجد؟ السلطان ده سايبه في الكنيسة، سايبه لأولاده. وهيسألهم عن السلطان ده: تاجروا به صح أم تاجروا به بطريقة خاطئة؟ فاد الناس به أم تعب الناس به؟

+ لكن تلاحظوا أن جلسة زيارة المريض تجمع الآتي:

 1- طلب الغفران.

 2- صلاة الأيمان.

 3- الاعتراف بالزلات.

 4- الدهن بالزيت.

 كل ده في جلسة القنديل. يا ريت بأه القنديل السنة دي اللي منكم يعمل قنديل، يبأه حريص على الكلام ده.

صلوا بعضكم لأجل بعض

" اِعْتَرِفُوا بَعْضُكُمْ لِبَعْضٍ بِالزَّلاَتِ، وَصَلُّوا بَعْضُكُمْ لأَجْلِ بَعْضٍ، لِكَيْ تُشْفَوْا "

+ " صَلُّوا بَعْضُكُمْ لأَجْلِ بَعْضٍ، لِكَيْ تُشْفَوْا " يعني إيه؟

+ يعني إحنا ككنيسة عائلة واحدة، أعضاء بعضنا البعض، لما نتوب نشجع بعض، ولما حد يمرض كلنا نصلي له، ولما يبقى فيه مشكلة كلنا نشيلها، وإن كان عضو يتألم جميع الأعضاء تتألم معه.

+ هو ده الإحساس اللي يفرح ربنا. هي دي الكنيسة الحقيقية قدام ربنا. لكن واحد عنده مشكلة، إحنا مالناش دعوة بي، لأ كده ما نبآش كنيسة.

طلب شفاعة الأبرار والقديسين

" طَلِبَةُ الْبَارِّ تَقْتَدِرُ كَثِيرًا فِي فِعْلِهَا".

+ ممكن واحد يقول: "تفرق إيه صلاة فلان عن صلاتي أنا"؟ يفرق إيه صلاة القديسين عن صلاتي أنا؟ ما أنا قديس أيضًا! نقوله بالراحة شوية!

+ الأبرار والقديسين جاهدوا طويلًا حتى يصلوا إلى هذه الدرجة:

 إحنا صحيح تقدسنا بالنعمة، كلنا مدعوين قديسين إكرامية من ربنا، فضل من ربنا إنه دعانا كلنا وقال: انتم " مَدْعُوِّينَ قِدِّيسِينَ". لأن ربنا داعينا للقداسة، لكن كون ربنا داعينا للقداسة، فهل كلنا واخدين شكل القداسة كما يليق؟! الحقيقة لأ. في ناس التزمت وعاشت بحهاد فأخذت الشكل ده، وفي ناس تهاونت جدا ولم تسلك كما يليق للدعوة التي دعيت إليها.

+ عشان كده منقدرش ننكر أن " طَلِبَةُ الْبَارِّ تَقْتَدِرُ كَثِيرًا فِي فِعْلِهَا".

أمثلة كتابية تؤكد أن طَلِبَةُ الْبَارِّ تَقْتَدِرُ كَثِيرًا فِي فِعْلِهَا

الرب يقبل شفاعة موسى في الشعب:

+ يعني صحيح كلنا ولاد ربنا، وصلواتنا حلوة قدام ربنا.

+ لكن صلوات واحد زي موسى النبي، كلمته غالية، تهز السما، يحط الشعب كله في كفة وهو في كفة، ويقوله: "يا رب بص لو ماكنتش هتسامحهم امحينى من كتابك اللى انت كتبته"، " وَالآنَ إِنْ غَفَرْتَ خَطِيَّتَهُمْ، وَإِلاَّ فَامْحُنِي مِنْ كِتَابِكَ الَّذِي كَتَبْتَ" (سفر الخروج 32: 32).

 ربنا يقوله: "يا موسى ما ينفعش"! إنت بالذات مش ممكن تهلك بعد اللي أنا عملته معاك واللي إنت عملته معايا.

 قاله: خلاص، يبأه الشعب كله ده أنا أفديه. أنا أشفع فيه.

 وعشان خاطر موسى والكلمتين بتوع موسى، ربنا غفر لشعب أكثر من نصف مليون نسمة.

أبونا إبراهيم يشفع في شعب سدوم وعمورة:

+ أبونا ابراهيم غالى جدا عند ربنا، يشفع في شعب آخر، شعب سدوم وعمورة.

+ يبأه ربنا بيحكم عليهم بالإعدام، ويقوله: "لأ يا رب معلش، إفرض في وسطهم 50 بار، طب إفرض 40، طب إفرض 30". معقول الكلام ده؟!

+ وأبونا إبراهيم بشفاعته وصلاته، ربنا يرحم شعب سدوم وعمورة لغاية لما ربنا ما يلاقيش حتى 10 اللي اتفق فيهم مع إبراهيم! ويهلك كل الشعب ما عدا لوط.

شفاعة السيدة العذراء:

+ أمنا العدرا اللى بتشفع فينا شفاعتها غالية جدا عند ربنا، احنا بنتشفع بصلواتها لأن طلبتها غالية، قوية جدًا. نقولها: "قوية ومقبولة عند مخلصنا هي طلباتك".

+ خلينا بأتضاع نعرف ونقبل، إن صحيح كل صلواتنا حلوة عند ربنا، وربنا بيسمع صلاة المسكين، لكن بإيمان بسيط نعلم أن البار له دالة عند الله، والقديسين الكبار لهم دالة. وهيدينا مثل هنا:

معلمنا يعقوب تكلم عن صلاة إيليا ليؤكد " طَلِبَةُ الْبَارِّ تَقْتَدِرُ كَثِيرًا فِي فِعْلِهَا ":

+ " كَانَ إِيلِيَّا إِنْسَانًا تَحْتَ الآلاَمِ مِثْلَنَا"، إيليا كان انسان عادي جدا، مثلنا، "تحت الآلام" يعني عادي، ولسه بيتوجع. وعلى فكرة بعد الحادثة دي، حصل له حالة إكتئاب وأعد فيها شوية، وعانى من مشاكل كثيرة. فهو إنسان في الظاهر: "تَحْتَ الآلاَمِ مِثْلَنَا". لم يفرق كثيرًا عنا.

صلاة إيليا غيرت الطبيعة ثلاثة سنوات ونصف:

+ " وَصَلَّى صَلاَةً أَنْ لاَ تُمْطِرَ، فَلَمْ تُمْطِرْ عَلَى الأَرْضِ ثَلاَثَ سِنِينَ وَسِتَّةَ أَشْهُرٍ "، هو قاله يا رب ما تخليهاش تمطر، قفلت السماء ثلاثة سنين ونصف.

+ وايليا بمنتهى الجبروت والجسارة قال لآخاب: "لاَ يَكُونُ طَلٌّ وَلاَ مَطَرٌ فِي هذِهِ السِّنِينَ إِلاَّ عِنْدَ قَوْلِي"، "إلا بكلمة مني!" مني! مش من ربنا حتى! ليه؟ ما انا هاقول لربنا هيفتح! إيه الجسارة دي؟! إيه الجرأة دي؟! إيه الثقة دي كلها؟! " طَلِبَةُ الْبَارِّ تَقْتَدِرُ كَثِيرًا فِي فِعْلِهَا".

ليس الكل على نفس الدرجة من البِر والقداسة:

+ طب ما حدش عرف يفتح السما ليه إذا كان كل الناس زي بعض؟! لأ طبعًا مش كل الناس زي بعض، إيليا غير باقي الناس. أكيد كان فيه ناس صالحين آخرين في الزمن ده، لكن ماحدش فيهم فيه بر إيليا.

+ فإيليا اللي حدد إن السما تتقفل، طبعًا بوحي من الروح القدس، وبعد كده ربنا قال: "افتح كفاية" ففتح، بعد 3 سنين ونصف.

+ شوف بأه لما تكون طلبة إنسان تغير نظام الطبيعة! يعني البلاد دي، بينزل المطر سنويًا في مواسم محددة. ده 3 سنين المواسم اتغيرت خالص! اتقلب نظام الجغرافيا، والطبيعة، عشان يسمع كلام ايليا. لأن " طَلِبَةُ الْبَارِّ تَقْتَدِرُ كَثِيرًا فِي فِعْلِهَا".

طلبة يشوع غيرت نظام الكون كله:

+ يشوع اتزنق في حرب، فقاله يا رب خلي الشمس واقفه شوية علشان نلحق نخلص، حاضر يا شوع ويوقف الشمس، ويمد النهار، ويلخبط نظام الكون كله، علشان بس يشوع يخلص المأمورية اللي كانت في إيده. كل دي اسمها " طَلِبَةُ الْبَارِّ تَقْتَدِرُ كَثِيرًا فِي فِعْلِهَا".

نحن نطلب شفاعة الأبرار لأن طلبتهم تقتدر كثيرًا في فعلها:

+ إحنا لما بنلجأ للأبرار، بنلجأ بإيمان واتضاع. إنما ندرك أن كلنا نصلي، وكل طلباتنا حلوة عند ربنا. ولكن الأبرار لهم قدرة. طلبتهم تقتدر في فعلها، علشان كده نلجأ دائمًا للقديسين.

" ثُمَّ صَلَّى أَيْضًا، فَأَعْطَتِ السَّمَاءُ مَطَرًا، وَأَخْرَجَتِ الأَرْضُ ثَمَرَهَا" (يع 5: 18).

جميع صلواتنا مسموعة من الرب ولكنه يستجيب في الوقت المناسب:

+ لما ربنا سمح رجع فك السما. ولكن يوم ما فك السماء، وهو ايليا النارى صاحب الصلوات الحارة جدًا، صلى اول مرة السما لم تستجيب، وتانى مرة ومستجبتش، وثالث مرة ولم تستجيب، وقعد سبع مرات يسجد ويقوم، يبص على السما إنها تنزل مطر مش راضية تنزل مطر!

+ حتى الأبرار في طلبتهم أحيانًا الاستجابة متجيش بسرعة، لأن ربنا هو اللى عارف يعمل كل حاجة في وقتها. لأن ربنا لكل شيء عنده تحت السماء وقت.

صل وأطلب شفاعة القديسين وثق أن الله سيفعل الصالح في الوقت المناسب:

+ مش معنى انك اتشفعت بالعدرا في موضوع يبقى لازم اللى انت عاوزة يحصل. لأ تأكد إن العدرا وصلت طلبك للمسيح. تأكد، وان ربنا يسوع المسيح نظر في الطلب، ان مكانش عشان خاطرك، يبقى عشان خاطر العدرا بالأولى، لكن لازم يحصل اللى انت عاوزه؟ لا دي بأه سيبها للأيام تقولك وتشرحلك المصلحة فين.

+ لكن تأكد طالما صليت طلبك دخل عند ربنا، ومن قبل حتى ما تتشفع بالقديسين طلبك بردو حلو. وحبذا لما تتشفع بالأبرار دول، ويدخلوا بالطلب معاك لربنا.

+ لما نقول للعذراء "إصعدي صلواتنا". شوفوا التعبير الحلو! فو احنا بنصلي صلواتنا بتطلع "يا أم النور شديها وأدخلي بها عند ربنا" "اصعدى صلواتنا إلى ابنك الحبيب". " طَلِبَةُ الْبَارِّ تَقْتَدِرُ كَثِيرًا فِي فِعْلِهَا".

الكهنة أيضًا على درجة من البر والقداسة لذلك نطلبهم للصلاة:

+ أيضًا هنا يفترض إنه، قسوس الكنيسة على درجة من البر، لأن الكلام هنا مرتبط بزيارة المريض، واستدعاء قسوس الكنيسة، واستخدام صلوات القسوس على اعتبار إن في هنا بر وقدرة وصلوات حارة أكثر.

+ ملخص الآيات من 12 - 19:

 فى الأول قالنا اللى عنده مشقة يصلي، اللى فرحان يرتل، واللى عنده مريض يروح يجيب ابونا ويعمل صلاة مسحة المرضى ويدهن بإسم الرب، ويصلي بإيمان، وصلاة الإيمان تشفي المريض و" طَلِبَةُ الْبَارِّ تَقْتَدِرُ كَثِيرًا فِي فِعْلِهَا "، ويقدم توبة، لأنه قد يكون هذا المرض فرصة له لكي يتوب.

 ثم في الآية 19 يوجه الكلام للكل.

الخدمة مسئولية كل من في الكنيسة، الخدمة تعبير حب للسيد المسيح

لا تنسوا دوركم في رد النفوس الخاطئة إلى الله:

+ في الآخر يقول: "أَيُّهَا الإِخْوَةُ، إِنْ ضَلَّ أَحَدٌ بَيْنَكُمْ عَنِ الْحَقِّ فَرَدَّهُ أَحَدٌ، فَلْيَعْلَمْ أَنَّ مَنْ رَدَّ خَاطِئًا عَنْ ضَلاَلِ طَرِيقِهِ، يُخَلِّصُ نَفْسًا مِنَ الْمَوْتِ، وَيَسْتُرُ كَثْرَةً مِنَ الْخَطَايَا "

+ أحيانا واحد يضل عن الحق، يعني يبعد عن ربنا او يتوه منه الحقيقة (الحق هو الحقيقة)، يعني واحد كان مؤمن بالمسيح كإله ضل عن الحقيقة وبقى ينكر أن المسيح إله، ضل عن الحقيقة ولم يعد يعتقد فيما تقوله الكنيسة، أو ضل عن الحقيقة ويعترف بوجود الله ولكنه يعيش حياه بعيدة عن الحقيقة (سلوك غير مسيحي وخطايا كثيرة).

" إِنْ ضَلَّ أَحَدٌ بَيْنَكُمْ عَنِ الْحَقِّ فَرَدَّهُ أَحَدٌ "

+ رد الإنسان عن ضلال طريقه، ده لنا دور فيه كبشر. طبيعي إن ربنا هو الذي يرد الخاطئين إليه، وهو الذي يشدنا نرجع له، ولكن ربنا يعطي للكنيسة ولنا كشعب فرصة أن نشارك ربنا في رد الخاطئين. لأن دى كبيرة قوى عند ربنا.

يقول إيه: "فَلْيَعْلَمْ أَنَّ مَنْ رَدَّ خَاطِئًا عَنْ ضَلاَلِ طَرِيقِهِ، يُخَلِّصُ نَفْسًا مِنَ الْمَوْتِ "

+ حاجة كبيرة قوى، إنك تجيب واحد كان ماشى في سكة غلط وترده لربنا، صدقوني لو أدركنا قيمة هذه الخدمة سنترك كل ما يشغلنا ولا نفعل شيء إلا الخدمة.

كم هو كبير في عيني الرب أن ترد خاطئ وتعيده لطريق الملكوت:

+ لو عرفنا يعني إيه تجيب واحد بس لربنا كان ماشي في سكة جهنم، وهيتنقل سكة الملكوت بسعيك، وبطول بالك، وبجهادك، وبسؤالك. دي لو عرفناها دي هنسيب كل حاجه تشغلنا ونركز في هذا فقط.

+ لأنه إذا واحد مثلًا ينقذ واحد بيغرق، يفضل الغريق بعد كده يقوله أنا مديونلك بعمري. أنا كل يوم أقضيه على الأرض بعد الآن ملكك. أنا حياتي دي كانت راحت مني وأنت اللي جبتهالي. كم بالأولى إذا كنت فتحت ابواب الأبدية أمام إنسان كان هالك. دي تمنها إيه دي؟! د إنت فتحت له سكة ابدية، مش كام سنة على الأرض وهيرجع يغرق ويموت تاني! لأ ده سكة السما كلها اتفتحت، لأنك رديته عن ضلال طريقه.

نحن نخسر الأكاليل بسلبيتنا تجاه الذين يبعدون عن حضن الكنيسة:

+ إحنا حوالينا ناس كتير ضالين، شباب كثيرة بيضيعوا وناس كتير بتنشغل عن ربنا، وناس بتغير كلامها وبترتد عن الحق، وناس بتسيب السلوك المسيحي وتسلك سلوك رديء. وإحنا بنأعد نتفرج؟! واغلب الناس تقول ملناش دعوة، ملناش دعوة ازاي؟! ماهو ملناش دعوة معناها، انتوا كمان خسرتوا اجر ومكافئة غالية جدًا، لأن هيبقى كبير قوى عند ربنا انك تنقذ واحد من ولاده.

+ صحيح ربنا مش محتاج حد يعمل خدمة، ربنا يقدر يعمل الخدمة كلها لوحده، لكن مدينا فرصة نخدم معاه علشان ناخذ أكاليل، مدينا فرصة نشترك في عملية "رد الخاطئين" دي، علشان يجازينا عن كل تعب هنعمله في خلاص أولاده.

+ تصور معايا أن لك ابن وكان بيموت وواحد أنقذه، تعمل إيه للي أنقذه ده؟! تقوله أنا كل اللي عندي اديهوك وأبأه مش عارف أشكرك كمان! ماهو ربنا هيعمل معانا كده. لما ترجع لربنا واحد من ولاده، يقولك: "يا حبيبى انت السما كلها قليلة عليك، دا انت جبت لي واحد من ولادى كان يهلك". تقوله: "يا رب انا فاهم كويس إن إنت اللى رجعته". يقولك: "بس إنت تعبت وروحت وحاولت، وقفل الباب في وشك مرة واثنين وثلاثة، ومايئستش، وفضلت وراه، ده إنت رجعتهولي. ودى كبيرة قوى لأن كل انسان شارد عن ربنا ابن لربنا، وربنا حزين عليه، فلما ترجعهوله " يَكُونُ فَرَحٌ فِي السَّمَاءِ(كلها) بِخَاطِئٍ وَاحِدٍ يَتُوبُ أَكْثَرَ مِنْ تِسْعَةٍ وَتِسْعِينَ بَارًّا لاَ يَحْتَاجُونَ إِلَى تَوْبَةٍ".

+ لو أدركنا معنى الخدمة، إنك لما تجيب واحد من ضلال طريقه وترده لربنا، هتفرح ربنا أد إيه؟!هيجازيك عن الحكاية دي أد إيه؟!

رد الخاطئ عن طريقه يستر خطاياه وخطاياك أيضًا:

" وَيَسْتُرُ كَثْرَةً مِنَ الْخَطَايَا"

+ بعد كده تقوله: "يا رب أنا وحش أوي، أنا مقصر"

+ يقولك: "وحش اية بقى، خلاص،أنا مش شايفك وحش ولا حاجة.

+ " وَيَسْتُرُ كَثْرَةً مِنَ الْخَطَايَا" مش بس خطايا الشخص اللى رجعته عن ضلال طريقه، ده حتى خطايانا نحن أيضًا نسترها حين نخدم الله ونرد الضالين.

+ طبعًا إحنا مافيش حاجه تستر خطايانا إلا دم المسيح، هو الكفارة، لكن معنى التأمل هنا أن الإنسان لما يجيب واحد لربنا كان بعيد خالص، يقوله: "يا رب انا جايبه بس يستر على تقصيراتى وعيوبى"، وربنا يقولك: "أنا واخد بالى أنا راضى وفرحان إنك إنت بخدمتك دى، عوضت تقصيرات كتير قوى في حياتك، وعوضت خطايا كتيرة، كفاية انك رجعت لي واحد من ولادى.

" مَنْ رَدَّ خَاطِئًا عَنْ ضَلاَلِ طَرِيقِهِ، يُخَلِّصُ نَفْسًا مِنَ الْمَوْتِ، وَيَسْتُرُ كَثْرَةً مِنَ الْخَطَايَا "

في الكنيسة الأولى كان الكل خدام في الكنيسة لأنه هكذا علمنا المسيح:

+ كان زمان مفيش حاجة اسمها خادم ومخدوم في الكنيسة، النظام ده جديد في الكنيسة، لكن لما نرجع للكنيسة الأولى، كان مفيش حاجه اسمها خادم. ليه؟ لأن المسيح نفسه خادم، فأي مسيحي خادم، فماكنش في نظام طبقات في الكنيسة، طبقة الخدام وغيره، كان كل واحد في الكنيسة خادم. بس في متخصص في خدمة الشباب، وواحد في خدمة الكنيسة نفسها، وواحد في خدمةالفقراء، وواحد في خذمة المرضى، لكن كل الشعب خدام.

+ يعني إيه مش بتخدم! ده دي حاجه خطيرة! ده إنت بالظبط كإنك بتقول أنا مش مسيحي. إزاي مش بتخدم إذا كان المسيح نفسه بيخدم! لازم تدور على حاجه تعملها. لازم تدور على شخص ترده لربنا، لأن هم مش قليلين، ياريت الكنيسة كلها فرحانة بولادها، ومافيش حد بره. لكن ده اللي بره أكثر من اللي جوه. يعني عندنا فرص نخدم لربنا ونرجع لربنا ولاده ونفرحه كل يوم!

+ صدقوني الآية دي لو الواحد عاش بيها، ممكن يقدم لربنا كل شوية نفس غالية، يرجع له نفس غالية، ويفرح به ربنا جدا "وَيَسْتُرُ كَثْرَةً مِنَ الْخَطَايَا".

إن كنت تحبني (يا بطرس) " ارْعَ خِرَافِي " " ارْعَ غَنَمِي" (يو21: 15، 16، 17).

+ بطرس في آخر لقاء له مع المسيح له المجد كان بيقوله: "يَا سِمْعَانُ بْنَ يُونَا، أَتُحِبُّنِي أَكْثَرَ مِنْ هؤُلاَءِ؟"

 قاله: "نَعَمْ يَا رَبُّ أَنْتَ تَعْلَمُ أَنِّي أُحِبُّكَ".

 يقوله: "ارْعَ خِرَافِي " " ارْعَ غَنَمِي " طب خلى بالك من ولادى

+ ويسأله تانى: بتحبنى صحيح يا سمعان؟

 يقوله: "طبعًا"

 يقوله: "ارعى غنمى"

+ يساله ثالت مرة: "أتحبني يا سمعان"؟

 يقوله: أيوه

 يقوله: طب خلى بالك من ولادى

+ وكأن الرعاية أو الخدمة أو افتقاد النفوس او السعى وراء الضالين هو تعبير حب للمسيح.

+ لما تيجي تقوله: "بحبك" يا رب. بتحبه إزاي وإنت شايفه حزين على أولاده وإنت شايف أولاده بيضيعوا ومش فارق معاك! واضح إنك مش بتحبه ولا حاجه، لو بتحبه صحيح روح اجرى وراء ولاده ورجع له اولاده اللى اتسرقوا منه.

الخدمة لا تحتاج إلى معلومات بل تحتاج إلى محبة للخاطئين:

+ في واحد يقول أصل أنا ما اعرفش! هي الحكاية مش محتاجه معرفة. أغلب الخدمات مش محتاجه معلومات، محتاجه حب، ومحتاجه إصرار، ومحتاجه مشغولية، واحد ينشغل بالموضوع، واحد يحب الشخص اللي بيبعد ويدور عليه ويسعى وراه، ولو عنده سؤال مش عارفه يقوله تعال ندور على الإجابة معًا، تعال نفكر في الموضوع معًا، ويشجعه يقوله: "طب أنا ما اعرفش، تعال نروح الكنيسة نسأل". يقوله: أنا ما بعرفش أصلي". يقوله: "وأنا كمان ما بعرفش أصلي زيك، تعال نشجع بعض".

+ الخدمة مش محتاجه واحد مخلص سنوات من إعداد خدام، ومن الدراسات، الكلام ده للي هيقوموا بدور الوعظ، والتعليم، لكن الخدمة كخدمة؟ كل واحد في الكنيسة لازم يخدم. وكل واحد لازم يبقى له نصيب في الآية دي، علشان كده يقول " أَيُّهَا الإِخْوَةُ" الكلام لك الشعب، "إِنْ ضَلَّ أَحَدٌ بَيْنَكُمْ عَنِ الْحَقِّ فَرَدَّهُ أَحَدٌ،
 فَلْيَعْلَمْ أَنَّ مَنْ رَدَّ خَاطِئًا عَنْ ضَلاَلِ طَرِيقِهِ، يُخَلِّصُ نَفْسًا مِنَ الْمَوْتِ، وَيَسْتُرُ كَثْرَةً مِنَ الْخَطَايَا".

بنعمة ربنا خلصنا رسالة يعقوب، ورسالة يعقوب رسالة غنية، إحنا عاملينها في مسابقة الحفظ، الناس تحفظها لو تقدر، اللي ما يقدرش يحفظ ياريت يقرا الرسالة، على بعضها، هي رسالة مليئة بالتداريب والسلوكيات الجميلة، ومليانة معاني ممكن تغير في حياة الواحد كثير.

_____

الحواشي والمراجع لهذه الصفحة هنا في موقع الأنبا تكلاهيمانوت:

(1) انتهت هنا المحاضرة الأولى، وتبدأ بعدها المحاضرة 2 عن نفس الأصحاح.