كتاب شفيعي الأنبا تكلا

كل واحد فينا عنده هوايات بيحبها: حد بيحب يرسم، حد بيحب يلعب كورة ورياضة، حد بيحب يتعلم كمبيوتر و AI، وحد بيحب كل الحاجات دي وغيرها... لما كبر "فرح صهيون" وبقى شاب، كان من هواياته الصيد في الغابة. لكن بعد فترة ظهر له الملاك ميخائيل وهو في رحلة من رحلاته للصيد، وقال له: كفاية وقت كتير في الصيد، من النهاردة هاتبقى تجيب ناس لربنا وتحكي لهم عنه وعن كلامه. واسمك هايبقى "تكلا هيمانوت"، ومعناه "زرع الآب والابن والروح القدس". وبعدها على طول ظهر له السيد المسيح وباركه وقال له يعمل إيه. راح الأنبا تكلا سلّم على أصحابه اللي كانوا معاه، وروّح البيت وقعد يصلي ويسبّح ربنا كتير إنه باركه ودعاه للخدمة.