|
|
ترنيمة كلمة في ودنك
+ كلمة ف ودنك لو تسمعها طول العمر تعيش فرحان
بدل الغم وشيل الهم وقولك دايماً أنا تعبان
أفتح للى واقف يقرع باب القلب بقاله زمان
لو تفتح له هاترتاح له وتفرش تحته ورد كمان
+ أوعى تفكر إنه هايدخل جوة قلبك فاضية إيديه
أبداً دا الخير طوله وعرضه جايبهولك بين إيديه
دا أنت هاتشبع لما تسمع صوت سلامه من شفتيه
لو تفتح له هاترتاح له حارم نفسك منه ليه
+لما هايدخل هاينضفلك الأفكار والأفعال
تلقى كل فكر خطية يهرب من قدامه في الحال
أصلك تلقي النور والظلمة في مكان واحد م المحال
لو تفتح له هاترتاح له وتبقي حياتك عال العال
+ غير المجد إللي هاتعيشه لما يكون الله جواك
هاينقيلك كل حواسك ها يقويك ويرعاك
تشعر إنك بالروح طاير زي حمامة في الأفلاك
لو تفتح له هاترتاح له وكمان روح الله يملاك
+ بس يا صاحبي أوعي تأجل زي العادة تقول بعدين
بكرة أو حتي لما أفضي وأنا قدامي شغل يومين
أصل بكرة ها يجر بعده وأنت ها تضمن بكرة منين
لو تفتح له هاترتاح له بس أوعي تقول بعدين
+ إيه المانع إنك تفتح م الليلة دي قلبك ليه
قول له يا ربي أدخل شرف بارك قلبي وأسكن فيه
طهر نقي سوي ورتب هو بتاعك أعمل فيه
لو تفتح له هاترتاح له قلبك ليه أنت مقسيه
[ www.St-Takla.org ]
__________________________________________________________________________________
© كنيسة الأنبا تكلا هيمانوت الحبشي القس - الإسكندرية -مصر / URL: http://St-Takla.org / إتصل بنا على:
